Нарăс уйăхĕн 21-мĕшĕнче, Пĕтĕм тĕнчери чăваш чĕлхи кунĕнче,  И.Н.Ульянов ячĕллĕ Чăваш патшалăх университетĕнче регионсем шайĕнчи чăваш чĕлхи тата литератури олимпиади иртнĕ. Мероприятие вĕренекенсен пултарулăхне аталантарас, тăван чăваш чĕлхине вĕренес кăмăлне ÿстерес, чĕлхе пĕлĕвĕпе культура тĕлĕшĕнчен çивĕч ăслă ачасене тупса палăртас, тĕпчев ĕçне хутшăнма хăнăхтрас тĕллевпе йĕркеленĕ. Регионсем шайĕнчи чăваш чĕлхи тата литератури олимпиадине 9, 10, 11-мĕш класра вĕренекенсем, олимпиадăн 2-мĕш тапхăрĕнче çĕнтернĕ тата иртнĕ çулхи регионсем шайĕнчи чăваш чĕлхи тата литератури олимпиадин çĕнтерÿçисем, çавăн пекех республика шайĕнчи олимпиадăсенче 1-мĕш вырăн йышăннă Пушкăртстан, Тутарстан республикисенчи, Чĕмпĕр облаçĕнчи   вĕренекенсем хутшăннă. Тупăшура 149 вĕренекен хăйсен пĕлĕвне тĕрĕсленĕ.

Шурут вăтам шкултан ăмăртăва 11 класра вӗренекен Голубева Алиса  хутшăннă, призерсен шутне кĕме пултарнă. Ӑна Тарасова Л.Н. вĕрентекен ертсе пырать. Вĕренекене тата вӗрентекене саламлатпăр, тĕнче шайĕнчи ăмăртура ăнăçу тата çитĕнÿ сунатпăр.